Nach dem Zwischenaufenthalt auf Erden

Nach dem Zwischenaufenthalt auf Erden !!

 

Ich sterbe, I stiarb, I krotz oh, I reiss A Bankl, I geh übern Jordan, I steh umme, I muas den leffe ogebn, mi drahts ham, mi hoit da Qui Qui, Manitou schau oba,

I schau scho in Hades, mit an Wurt, aus is, I steh vorm Schöpfer.

( da wer I eam oba sogn das ER des Leben ah bessa hätt afocha mochn kenna).

Oiso, I bin hie, lieg do, riah mi nimma, sich oba schon von oben die gaunze Baggage wias um mi gaunz foisch rean und mi loben.

(Daweu wortens nur drauf das die Leich vorbei is und sie zum Fressen und sauffen kumma)……. Oiso die Pombfenebra, de Kapslpracker, lossn den Sorg in de Gruam (des is oba, wia mans ah beschreibt, des anzig wore gerechte aum Leben). Najo wos erwort mi waun I den Leffe ogebn hob? Is des woar das mi de Engal ohoin und auffebringa in den Himme? Oda kriag I ah Numma zum Austölln am Himmelstor?

Frogn über Frogn. Besonders über des wia, wos, waunn, warum und wiaso und wohin.

Nemma au mi beittelts oh und I find mi wieda.. oba wo?

I kaun man net vuastölln das mi de Engaln ohoin und mit haleluja durch an beleichtn Tunnel zum Herrgott bringa. Aum schenstn wars waun da Herrgott ka Mau is, sondern ah fesche Kotz, ah Frau, des war sche.

 Oda irgend ah Wesen? Geschlechtslos?

Sozusogn ah Zwitter, das ka Weiberl oder Manderl benochteuligt is.

Und muaß I wirklich fünf moi aum tog Halleluja singa?

Oba waunns sei muaß, daunn wenigstens im Walzertakt, dazwischn frohlocken im Reagge-Rythmuss, in da Nocht leise Lamour-hatscha.(Kaun ma dort obn ah Pantscherl haubm?) Gibt’s wos zum Essn ? Wos hob I au?

Gibt’s wos zum Trinken? (Kaun ma do Schnopsn? oda Tarrokiern?) 

Des !! San Wichtige Frogn. Im himme oda wia des daunn hasst, is des eigentlich daun eh wuarscht, ma is jo eh scho gsturm.

Is mei Oide ah im Paradies? Na hoffentlich kebbelts net do obn weida mit mir.

Eigentlich ah guate Vorstellung, Host kann Köch mit de Haberer, des Finanzaumt kaun die Moschaln, Inspekta gibt’s kann, denn durt obn brauchst ka Heh. Göd brauchst kans, zoist mit an Lächeln.          

Oiso brauchst ka Aungst haum, is ollas leiwaund durt obn.

Brauchst da nua des ollas fest vuastölln, daunn wirds bestimmt wos mitn Himme, noch dem vermaledeiten Leben.

Kruzifix no amoi Glaubts ma des.